Үндэсний статистикийн хорооноос гаргасан мэдээгээр Улсын хэмжээнд 2019 оны 1 дүгээр сард 5956 эх амаржиж, 6001 хүүхэд төрүүлсэн нь өмнөх оны мөн үеэс амаржсан эх 277 (4.4хувь)-гоор, амьд төрсөн хүүхэд 270 (4.3хувь)-аар буурсан үзүүлэлт гарчээ.

Нялхсын эндэгдэл 2019 оны 1 дүгээр сард 112 болж, өмнөх оны мөн үеэс 16 (16.7хувь)-гаар, 5 хүртэлх насны хүүхдийн эндэгдэл 139 болж, 26 (23.0хувь)-гаар тус тус өссөн байна.

1000 амьд төрөлтөд ногдох нялхсын эндэгдэл 2019 оны 1 дүгээр сард 19 болж, өмнөх оны мөн үеэс 4 хүүхдээр, харин тав хүртэлх насны хүүхдийн эндэгдэл 23 болж, 5 хүүхдээр тус тус өссөн байна.

Эхийн эндэгдэл 2019 оны 1 дүгээр сард 3 болж, өмнөх оны мөн үеэс 2 (3 дахин)-оор нэмэгдсэн байна. Харин 100 000 амьд төрөлтөд ногдох эхийн эндэгдэл 2019 оны 1 дүгээр сард 50 болж, өмнөх оны мөн үеэс 34-өөр нэмэгджээ.

Халдварт өвчнөөр өвчлөгчид 2019 оны 1 дүгээр сард 3.7 мянга болж, өмнөх оны мөн үеэс 333 (10.0хувь)- аар өсөхөд салхин цэцгээр өвчлөгчид 379 (39.6хувь)-өөр, гонококкт халдвараар өвчлөгчид 140 (36.3хувь)-өөр, цусан суулгаар өвчлөгчид 40 (15.3хувь)-өөр, сүрьеэгээр өвчлөгчид 22 (7.9хувь)-оор, трихомониазаар өвчлөгчид 23 (6.9 хувь )-аар өссөн нь голлон нөлөөлсөн байна. Харин гар, хөл, амны өвчнөөр өвчлөгчид 127 буюу 3.8 дахин, тэмбүүгээр өвчлөгчид 102 (17.5хувь)-оор, мөөгөнцрөөр өвчлөгчид 13 (8.2хувь)-аар, вирүст хепатитаар өвчлөгчид 10 (20.4хувь)-аар буурсан байна.

Улаанбаатар хотод 2019 оны 1 дүгээр сард ХДХВ/ДОХ-ын тохиолдол илрээгүй бөгөөд улсын хэмжээнд бүртгэгдсэн ХДХВ/ДОХ-ын нийт тохиолдол 268 байна.